Eýranyň Ýokary milli howpsuzlyk geňeşiniň sekretary, ABŞ bilen baglaşyljak islendik parahatçylyk ylalaşygynyň çäginde, Eýranyň baýlaşdyran uranyny başga bir ýurda geçirmejekdigi baradaky Tähranyň pozisiýasyny gaýtalady.
Liwanyň “Al Mayadeen” teleýaýlymyna beren interwýusynda Mohsen Rezaýi Eýranyň “baýlaşdyrylan ýadro materialynyň bir atomyny hem aýyrmajakdygyny” aýtdy we Tähranyň bu karary barada Moskwany eýýäm habarly edendigini sözüne goşdy. Eýranyň ýokary derejede baýlaşdyrylan uran gorlaryny ýerleşdirmek üçin mümkin bolan ýer hökmünde Russiýa köp gezek agzalýar.
Rezaýiniň aýdanlaryndan käbir bölekler 11-nji noýabrda, şol günüň ahyrynda efire berilmegi meýilleşdirilen doly interwýudan öň çap edildi.
Degişli maglumat
Tramp gepleşiklerde öňe gidilse Eýrana garşy täze hüjümler etmek 'ähtimallygynyň juda pesdigini' aýtdyBirleşen Ştatlar we Ysraýyl 2025-nji ýylyň iýun aýynda üç sany esasy ýadro desgasyna hüjüm etmezden öň, Halkara Atom energiýasy agentligi (HAEG) Tähranyň 60 göterime çenli baýlaşdyrylan 440,9 kilogram ýadro materialynyň bardygyny çaklady.
Inspektorlar bu materialyň näçesiniň hüjümlerden aman galandygyny ýa-da onuň nirede saklanandygyny anyklap bilmediler. Şol bir wagta, 28-nji fewralda başlan - heniz çözülmedik - täze çaknyşyklarda desgalara goşmaça howa hüjümleri edildi.
Awgust aýynda Eýranyň Ýokary milli howpsuzlyk geňeşiniň sekretary wezipesine bellenen we geňeşde ýurduň ýokary ruhany lideri Mojtaba Hameneýiniň wekili hökmünde çykyş edýän Rezaýi geçen hepde Kremlde Russiýanyň prezidenti Wladimir Putin bilen duşuşdy.
Rezaýiniň bu beýanaty, onuň bilen ABŞ-nyň wise-prezidenti JD Wansyň arasynda geçirilen we Eýrana garşy tapgyr dokuz aý bäri dowam edýän urşuň bes edilmegine we Hormuz bogazynyň gaýtadan açylmagyna mümkinçilik döretjek ylalaşyk barada gepleşik geçirmek üçin geçiriljek mümkin bolan duşuşyk baradaky habarlaryň ýaýran mahalyna gabat geldi.
“Al Mayadeen” gazeti Rezaýiniň Tähran bilen Waşingtonyň arasynda hiç hili gepleşikleriň geçirilmändigini aýdandygyny we ýakynda Katarda geçirilen duşuşyk baradaky habarlary “doly ýalan” diýip ret edendigini we duşuşyk baradaky habarlaryň uruş sebäpli Ýakyn Gündogarda dörän durnuksyzlyk zerarly dünýäde ýokarlanan nebit bahalaryny peseltmäge gönükdirilendigini belländigini habar berdi.
Eýran bilen Birleşen Ştatlar henizem ejiz gapma-garşylykda saklanyp galýarlar, iki tarap hem doly möçberli urşa gaýdyp gelmeýär ýa-da dowamly parahatçylygyň ýola goýulmagynda uly öňegidişlik gazanmaýar.
Degişli maglumat
Eýran Trampyň aralyk saýlawlardaky şowsuzlygyndan soň onuň indiki hereketini synlaýarGiň gerimli söweşler esasan togtadylan bolsa-da, Eýranyň ýadro programmasy, ABŞ-nyň deňiz güýçleriniň Eýranyň portlaryny blokadalamagy we Hormuz bogazynda gämi gatnawynyň kesilmegi ýaly esasy jedelli meseleler çözülmän galýar.
9-njy noýabrda ABŞ-nyň prezidenti Donald Tramp urşy gorap çykyş etdi, ýöne şol bir wagtyň özünde onuň harby taýdan "iş ýüzünde tamamlanandygyny" aýtdy, bu bolsa Ak Tamyň Birleşen Ştatlaryň howa hüjümlerini täzeden başlatmagy mümkindigi baradaky ýakynda eden haýbatlaryndan daşlaşýandygyny görkezýär.
ABŞ-nyň döwlet sekretary Marko Rubionyň sözlerine görä, Tährana garşy ykdysady we harby basyşy dowam etdirmek strategiýasy, ähtimal, dowam eder.
"Eýrana garşy ykdysady kampaniýa şeýle bir weýran ediji welin, häzirki wagtda giň möçberli söweş operasiýalaryna zerurlyk ýok" diýip, ol 10-njy noýabrda Parižde geçirilen G7 ýurtlarynyň daşary işler ministrleriniň duşuşygyndan soň aýtdy.
Bu aralykda, Eýran sanksiýalaryň ýeňilleşdirilmegi, doňdurylan aktiwlerine elýeterlilik, blokadanyň aýrylmagy we sebitde, esasanam Liwanda duşmançylygyň bes edilmegi ýaly möhüm ylalaşyklar bolmazdan strategik taýdan möhüm suw ýoluny täzeden açmakdan ýüz öwürýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.