ABŞ-nyň prezidenti Donald Trump, parahatçylyk gepleşiklerinde öňegidişlikleriň bolýandygy görlen ýagdaýynda, Eýrana garşy täze howa hüjümlerini amala aşyrmak "ähtimallygynyň juda pesdigini" aýtdy.
"Bu, [eýranly gepleşikçileriň] örän berk ylalaşyga gol çekip-çekmezligine bagly" diýip, Tramp 8-nji noýabrda CNN-e telefon arkaly beren interwýusynda aýtdy. "Jogap şeýle: Munuň zerur bolmagynyň ähtimallygy juda pes" diýip, ol sözüne goşdy.
Şeýle-de, Tramp hüjümler gaýtadan başlan halatynda ABŞ-nyň harbylarynyň eýýäm potensial infrastruktura nyşanlaryny, şol sanda "bir sagadyň içinde ýok edip biljek" 38 sany köprini kesgitländigini aýtdy.
Mundan başga-da, Tramp sosial mediada paýlaşan maglumatynda "Demir derweze iş topary" diýip atlandyran gurluşyny öwdi. Onuň aýtmagyna görä, bu, Eýranyň ösen ýaraglarynyň we beýleki sanksiýa girizilen harytlarynyň ýurduň gury ýer serhetlerinden we Hazar deňziniň üsti bilen geçirilmegine garşy göreşer.
Degişli maglumat
Eýran Trampyň aralyk saýlawlardaky şowsuzlygyndan soň onuň indiki hereketini synlaýarTrampyň bu beýanaty, taraplaryň ikisiniň hem Hormuz bogazynda we onuň töwereginde gämilere hem-de kenarýaka desgalaryna belli bir möçberde hüjümleri dowam etdirýän wagtyna gabat geldi.
Şeýle-de, Tramp Eýran bilen baglanyşykly urşuň geçen hepde ABŞ-da geçirilen aralyk saýlawlarda Respublikan partiýasynyň uly ýitgiler çekmeginiň sebäplerinden biridigini boýun aldy.
Trampdan soň 2028-nji ýyldaky saýlawlarda onuň ornuny tutmaga mümkin dalaşgär hökmünde görülýän wise-prezident JD Wans öňki beýanatlarynda has açyk çykyş edip, "[saýlawlarda] ýeňilmegimiziň sebäbi uruşdyr" diýipdi.
8-nji noýabrda žurnalistlere beren beýanatynda Tramp "köp adamyň Wansyň Eýran baradaky sözlerini halamandygyny" aýtdy.
2028-nji ýyldaky saýlawlarda Respublikan partiýasyndan prezidentlige dalaşgär bolmagy mümkin bolan başga bir dalaşgär döwlet sekretary Marko Rubio 8-nji noýabrda eden çykyşynda uruş bilen saýlawlaryň arasyndaky gös-göni baglanyşyk barada hiç zat aýtmady.
Emma ol "size aýdyp biljek ýeke-täk zadym, Birleşen Ştatlaryň prezidenti bu ýurt üçin örän köp wagt bäri dowam edip gelýän örän hakyky howpy anyklady we oňa garşy çäre gördi" diýdi.
Rubio parahatçylyk gepleşiklerinde düýpli öňegidişligiň ýakyn wagtda boljakdygyna ynanmaýandygyny hem aýtdy.
"Prezident bu we ähli meseläni hemişe diplomatik ýol bilen çözmegi saýlap alýar. Gynansak-da, käwagt bu mümkin däl. Emma eger mümkinçilik bolsa, biz ony göz öňünde tutarys. Häzirki wagtda bu örän netijeli bolmady, sebäbi Eýranyň talaplary diňe kabul ederliksiz bolman, eýsem käbir ýagdaýlarda adatdan daşary, gülkünç we düýbünden real däl" diýip, Rubio aýtdy.
Şeýle-de, Tramp žurnalistlere beren maglumatynda indiki hepde Hytaýda geçiriljek Aziýa-Ýuwaş umman ykdysady hyzmatdaşlygy guramasynyň (APEC) sammitiniň çäklerinde Russiýanyň prezidenti Wladimir Putin we Hytaýyň prezidenti Si Szinpin bilen duşuşjakdygyny we gün tertibinde Eýran meselesiniň ara alnyp maslahatlaşyljakdygyny aýtdy.
Makala Reuters we CNN neşirleriniň maglumatlary esasynda taýýarlandy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.