Türkiýäniň prezidenti Rejep Taýyp Erdogan ukrain kärdeşi Petro Poroşenkony Ankaranyň Krymy, Orsýet tarapyndan bikanun anneksiýa edilen sebiti, ozalkysy ýaly, Ukrainanyň territoriýasy diýip hasaplajagyna ynandyrdy.
Ukrain prezidentiniň metbugat gullugy 20-nji awgustda Erdoganyň Poroşenko bilen telefonda gürleşendigini habar berdi.
Habarda aýdylmagyna görä, Erdogan Türkiýäniň ukrain garaşsyzlygyna we toprak bütewiliginiň eldegrilmesizligine, halkara ykrar edilen serhetlerine goldawy babatdaky pozisiýasyny üýtgetmändigini aýdypdyr.
Şeýle-de Erdogan Ankaranyň «Krymyň basylyp alynmagyny» ykrar etmejekdigini, krym tatarlaryny bolsa mümkin bolan ähli ugurlarda goldajakdygyny aýdypdyr.