ABŞ-nyň wise-prezidenti Maýk Pens, režimiň ýadro we raketa programmalary sebäpliDemirgazyk Koreýada dartgynlylyklaryň ýokarlanýan wagtynda, Ýuwaş okean sebitine 10 günlük saparynyň başynda Günorta Koreýa geldi.
Pens Seula 16-njy aprelde, Günorta Koreýa we Birleşen Ştatlar Demirgazyk Koreýanyň atan raketasynyň şowsuzlyga uçrandygyny aýdanyndan sähel soň geldi.
Demirgazyk Koreýanyň ýokary derejeli şowsuzlygy ABŞ-nyň uçar göteriji gämisiniň Koreýa ýarymadasynyň suwlaryna tarap barýan wagtyna gabat geldi.
Emma muňa garamazdan, harby resmiler, ýadro synagyna ýa raketa atmagyna jogap edip, ABŞ-nyň Demirgazyk Koreýa garşy harby güýç ulanmak niýetiniň ýokdugyny aýdýarlar.
Pens öz aýaly Karen bilen Seulyň Milli gonamçylygynda guralan gül çemenini goýmak dabarasyna gatnaşdy.
ABŞ-nyň prezidenti Donald Tramp şu hepde Demirgazyk Koreýa barada soralanda, žurnalistlere “Demirgazyk Koreýa bir problema bolup durýar. Bu problema barada alada ediler” diýdi.
Ol eger-de Hytaý, Demirgazyk Koreýanyň esasy söwda hyzmatdaşy Demirgazygy gysmak üçin has kän tagalla etmek islemese, Birleşen Ştatlaryň bu meseläni öz eline almagy ahmal diýip, gaýtalap aýtdy.