BMG-niň ýadro gözegçilik edarasy Eýrandan wagtlaýyn ýadro gözegçilik şertnamasynyň möhletini uzaltmak boýunça hiç hili jogabyň bolmandygyny aýtdy. Atom energiýasy boýunça halkara agentligi bu barada 25-nji iýunda mälim etdi.
Mundan öň, ABŞ we Fransiýa şertnamanyň möhletiniň uzaldylmazlygy 2015-nji ýyldaky ýadro ylalaşygyny dikeltmek baradaky alnyp barylýan gepleşiklere ýaramaz täsir ýetirip biljekdigini duýdurdylar.
Atom energiýasy boýunça halkara agentliginiň we Eýranyň arasynda fewralda baglaşylan wagtlaýyn gözegçilik şertnamasynyň möhleti 24-nji iýunda tamamlandy. Bu şertnamanyň çäginde halkara jemgyýetçiligi Eýranyň ýadro programmasy babatyndaky özgerişlerden habarly bolupdy.
Atom agentliginiň başlygy Rafael Grossiniň 25-nji iýunda aýtmagyna görä, Eýran gözegçilik şertnamasynyň möhletini uzaltmaga meýillidigi barada hiç hili yşarat görkezmedi, şeýle-de ugradylan hatlara jogap bermedi.
“Bu mesele boýunça Eýranyň gyssagly jogaby gerek” diýip, Grossi aýtdy. Ol agentligiň Eýrandaky gözegçilik işlerini dowam etdirmeginiň “aşa möhümdigi” hem sözüne goşdy.
Eger-de ylalaşygyň möhleti uzaldylmasa, onda munuň 2015-nji ýyldaky ýadro şertnamasyny dikeltmek boýunça Wenada alty hepde bäri alnyp barylýan gepleşiklere howp abandyrmagy mümkin.
“Halkara atom agentligi baradaky mesele çynlakaý aladalary döredýär” diýip, ABŞ-nyň döwlet sekretary Antoni Blinken 25-nji iýunda Parižde özüniň fransuz kärdeşi bilen birlikde geçiren metbugat ýygnagynda aýtdy.