Aşgabatda nobatdaky klasiki aýdym-saz konserti Döwlet simfoniki orkestriniň gatnaşmagynda geçirildi. Türkmenistanyň Medeniýet ministrliginiň guran bu medeni çäresine gatnaşan tomaşaçylaryň köpüsi konserwatoriýanyň studentleridi. Azatlyk Radiosynyň habarçysy Aşgabatdan gürrüň berýär.
Tomsuň soňunda - 28-nji awgustda Türkmenistanyň Medeniýet ministrliginiň Mukamlar köşgünde guran çäresinde Resul Glyjowyň ýolbaşçylygyndaky Döwlet simfoniki orkestri çykyş etdi. Gelenleriň arasynda hemişeki tomaşaçylar azdy, zalda konserwatoriýanyň okuwçylary köplük edýärdi.
Konsertiň programmasy umumy görnüşde yglan edildi we onuň çap görnüşli tertibi ýokdy. Şol sebäpden, aýdym-saz konsertiniň garaşylmadyk başlangyjy örän täsirli boldy - orkestr iki sany meşhur eseri Türkmenistanyň Döwlet hory bilen bilelikde ýerine ýetirdi.
Birinjisi, meşhur nemes kompozitory Karl Orfyň (1895-1982) "Carmina Burana" kantatasyny soňlaýan "O Fortuna" eseri boldy. Adamyň üýtgeýän ykbaly barada tragiki seslenýän bu eser demoniki gutulgysyzlyk we mistiki dabaralanma duýgularyny döredýär. Karl Orfyň öz eserlerinde "aýdym-sazyň we teatryň simbiozyny" döretmek başarnygy üçin ol bawariýaly synagçy adyna eýe bolupdy.
Horuň orkestr bilen ýerine ýetiren ikinji eseri, häzirki zaman grek kompozitory Wangelisiň (1943-2022) 1992-nji ýylda döredilen Kristofer Kolumb barada "1492. Jennetiň ýeňilmegi" atly filmde ulanylan sazdy. Güýçli, epiki sazyň ýerine ýetirilmegi 17-nji maýda koronawirusdan aradan çykan beýik kompozitoryň hormatynyň beýanyna öwrüldi.
Ewangelos Odysseus Popatanasiou - bu Wangeliusyň doly ady - elektron aýdym-sazyň ilkinji awtorlaryndan we ýerine ýetirijilerinden biri hasaplanýar. Şeýle hem ol "El Greko", "Aleksandr", "Ajy Aý" we beýleki meşhur filmlerdäki aýdym-sazlaryň awtory.
Zal orkestre we ilkinji nobatda ajaýyp hora joşgunly el çarpyşma bilen minnetdarlyk bildirdi.
Konsertde çykyş eden hor türkmen dilinde iki aýdymy ýerine ýetirdi. Resul Glyjowyň ýolbaşçylygyndaky sazandar toparlarynyň çykyşlaryna yzygiderli gelýän tomaşaçylar üçin Türkmenistanyň döwlet horunyň çykyşy "programmanyň iň esasy pursaty", garaşylmadyk sowgady boldy we täze konsertlere güýçli isleg döretdi.
Konsertde solist aýdymçylar Selbiniýaz Annadurdyýewa, Leýli Okdirowa we Gurbanmyrat Jumanyýazow çykyş etdi.
Günbatar klassiklerinden D.Puççiniň we D.Werdiniň iki ariýasy ýerine ýetirildi. Ondan soň ýerine ýetirlen eserleriň Nury Muhatowyň “Gel, Türkmenistan” filminden başga ählisi meşhur kompozitor Rejep Rejepowyň eserleridi. Rejepow hem Wangelis ýaly geçen ýylyň ýanwar aýynda aradan çykdy. Ussatlaryň eserleriniň ýerine ýetirilmegi sazandalaryň hormatyna bildirlen minnetdarlyk boldy.
Sazanda Resul Glyjow bilen Rejep Rejepowyň arasynda aýratyn gatnaşyk bardy. Kompozitor özüniň 75 ýaş toýy mynasybetli geçirilen ýubileý konsertinde ýaş kärdeşine eserini bagyşlapdy. Bu uly hormatyň nyşanydy. Kompozitoryň aýal dogany, onuň aradan çykmagyndan soň, Resul Glyjowa Rejepowyň Moskwanyň Çaýkowskiý konserwatoriýasynda geçiren student ýyllaryndan bäri ýygnan saz plastinkalarynyň seýrek ýygyndysyny gowşurdy.
Tutuş konsertiň dowamynda ekranda kinofilmlerde pursatlar görkezildi.
Ömrüniň dowamynda klassige öwrülen türkmen kompozitorynyň döreden eserleriniň ekranda görkezilen ak-gara filmlerden alnan pursatlar bilen bilelikde ýerine ýetirilmegi tomaşaçylarda uly täsir galdyrdy. Köplerde şol filmleri gaýtadan görmäge isleg döredi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum