Balkan welaýatynyň Serdar we Bereket etraplaryndaky ekerançylyk meýdanlarynda ýaňy-ýakynda düwünçek getirip başlan giç käşir we kelem ýaly gök-bakja ekinleri ýerli häkimiýetleriň buýrugy bilen sökülýär. Bu habaryň jikme-jikligi barada Azatlyk Radiosynyň habarçysy sebitden habar berýär.
Häkimiýetler ekerançylyk ýerleriniň sökülmegi baradaky tabşyryklaryny ýerleriň bugdaý ekişine taýýarlanylmagy we sürüm işleriniň geçirilmegi bilen esaslandyrýarlar.
Azatlyk Radiosynyň habarçysy bilen gürrüňdeş bolan ýerli daýhanlar bugdaý ekmek üçin sökülýän ekerançylyk meýdanlarynyň ozal hem bugdaý meýdanlary bolandygyny, ýöne tomus ýygnalan bugdaý hasylynyň yzyna, ikinji gezek hasyl almak üçin, giç käşir, kelem we şugundyr ýaly gök-bakja ekinleriniň ekilendigini aýdýarlar.
“Iýun aýynda bugdaýdan boşan ýerlere giç käşir, kelem we şugundyr ýaly gök-bakja ekinleri ekilipdi. Bu ekinler oktýabr aýynda bişip ýetişýär. Häzirki wagtda ýaňy bir hasyla duran, düýp görkezip başlan bakja önümleri etrap häkimiýetleri tarapyndan sökülýär” diýip, bir ýerli daýhan Azatlyk Radiosynyň habarçysyna gürrüň berdi.
Ýerli daýhanlar sökülen ýerlerde bugdaý ekişine taýýarlyk çäreleriniň çäginde sürüm işleriniň geçirilýändigini aýdýarlar.
Türkmenistanda güýzlük bugdaý ekişine resmi derejede 2-nji sentýabrda girişildi.
Üstümizdäki ekiş möwsüminde Türkmenistanda 690 müň gektara bugdaý ekilýär. Öňümizdäki hasyl möwsüminde ýurt boýunça 1 million 400 müň tonna bugdaý hasylyny ýygnap almak meýilleşdirilýär.
Gallaçy kärendeçiler Ahal welaýatynda 400 müň, Mary welaýatynda 345 müň, Lebap welaýatynda 310 müň, Daşoguz welaýatynda 265 müň we Balkan welaýatynda 80 müň tonna däne hasylyny ýygnamagy maksat edinýärler.
Türkmenistanda döwlet tabşyrygyna girýän esasy ekinleriň – bugdaýyň we gowaçanyň – ekişine döwlet derejesinde badalga berilýär. Ekiş we hasyl möwsümleri döwlet baştutany tarapyndan yglan edilýär.
Balkan welaýatynyň Serdar we Bereket etraplarynda ýaňy bir hasyl getiren bakja ekinleri bugdaý üçin sökülýän daýhanlar bu ekinleri ösdürip ýetişdirmek üçin sarp eden harajatlaryna gynanýandyklaryny aýdýarlar.
Welaýatyň Bereket etrabynyň Kelif obasynda Azatlyk Radiosynyň habarçysy bilen gürrüňdeş bolan bir ýerli kärendeçi iýun aýynda bugdaýdan boşan üç gektar kärende ýerine eken bakja ekinleriniň häkimiýetler tarapyndan puja çykarylýandygyny aýdýar.
Ol bakja önümlerini ösdürip ýetişdirmek üçin öz hasabyna tohum we dökün satyn alandygyny aýdýar. Ýerli kärendeçi hasylyň ýetişmegine sanlyja hepde galanda gök-bakja ekinleriniň sökülmegini nägilelik bilen garşylaýar.
Ol uly umyt bilen garaşan “girdejisiniň köýendigini” aýdýar.
Azatlyk Radiosynyň habarçysynyň maglumatlaryna görä, Bereket etrabynyň Kelif obasynda, Serdar etrabynyň Ters, Zaw, Tutly, Çerkezli obalarynda we “Ýaşlyk” daýhan birleşiginde söküm işleriniň alnyp barylýar.
“Daýhanlaryň uly umyt bilen eken ekinleriniň hasylynyň toprak aşagynda galmagy daýhanlaryň elini işden sowadýar” diýip, bir ýerli ýaşaýjy Azatlyk Radiosynyň habarçysyna gürrüň berdi.
Mundan ozal, “Türkmenistanyň hronikasy” neşiri 29-njy awgustda Lebap welaýatynyň Hojambaz etrabynyň Beşir obasynda kädi ekilen ýerleriň hem häkimiýetler tarapyndan sökülmeginiň buýruk berlendigini habar berdi.
Neşir 6-njy sentýabrda welaýatyň Çärjew etrabynda hem gök-bakja ekilen meýdanlaryň bugdaý üçin söküljekdigini habar berdi.
Türkmen metbugatyna görä, şu ýyl Ahal welaýatynda 195 müň gektar, Mary welaýatynda 170 müň gektar, Daşoguz welaýatynda 145 müň gektar, Lebap welaýatynda 130 müň gektar we Balkan welaýatynda 50 müň gektar meýdana azyklyk bugdaý ekiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum