Sepleriň elýeterliligi

Soňky habar

Maryda ýangyn howpsuzlygy işgärleri barlag geçirýär, jerime ýazmak we para almak 'möwjeýär'


Illýustrasiýa suraty
Illýustrasiýa suraty

Şu günler Mary welaýatynyň Polisiýa müdirliginiň Ýangyn howpsuzlygy bölüminiň işgärleri durmuş maksatly desgalara, hojalyk jaýlaryna we hususy eýeçilikdäki dükanlara aýlanyp, ýangyn döredip biljek enjamlary barlaýarlar. Ýaşaýjylar işgärleriň bu barlaglary ilatdan para almagyň ýene bir guralyna öwrendigini aýdýarlar. Bu barlaglar türkmen hökümetiniň güýz-gyş ýyladyş möwsümine taýýarlyk işini maslahat etmeginiň yz ýanyna gabat geldi.

Azatlyk Radiosynyň Marydaky habarçysynyň maglumatlaryna görä, Ýangyn howpsuzlygy bölümiň işgärleri gapyma-gapy aýlanyp, hojalyk jaýlaryndaky elektrik simleriniň talaba laýyk çekilendigini ýa hatardan çykmandygyny, goşmaça çekilen gaz turbalaryny we plastik şlanglary barlaýarlar.

"Güýz paslynda howanyň sowap başlan günlerinde geçirilýän bu barlaglarda elektrik simleriň açyk ýeri bolsa, öýlere goşmaça gaz peçler we plastik şlanglar çekilen bolsa, onda raýatlara jerime ýazylýar. Jerimäniň mukdary 1000 manada çenli baryp ýetýär. Ähli zat düzüw bolsa, onda işgärler iki sany kagyza gol çekdirip, 30 manat tölemeli edýärler" diýip, maryly ýaşaýjy anonimlik şertinde aýtdy.

Habarçymyzyň sözlerine görä, welaýatda howanyň temperaturasynyň aşaklamagy bilen, ýaşaýjylar irden we gije ýylynmak üçin elektrik we gaz peçlerinden peýdalanmaly bolýarlar. Muňa şäherdäki jaýlaryň tas ählisinde merkezleşdirilen ýyladyş ulgamynyň göz öňünde tutulmandygy ýa-da olaryň talaba laýyk işlemeýändigi sebäp bolýar.

"Hut şu sebäpli işgärler edara-kärhanalara baranlarynda, kemçilikleriňiz göz ýumýarys' diýip, her edaradan azyndan 400-500 manat para soraýarlar" diýip, býujet işgäri anonimlik şertinde aýtdy.

Telekeçileriň ençemesiniň habarçymyza gürrüň bermegine görä, barlagçylar şu günler hususy eýeçilikdäki dükanlara hem yzygiderli aýlanyp, dürli sebäplere görä, jerime ýazýarlar ýa-da ýüzlerçe manat möçberinde para alýarlar.

"Dükanlarda elektrik we gaz üpjünçiligi doly ýola goýulmandygy sebäpli, gijeki garawullarymyz ýylynmak üçin elektrik peçlerinden peýdalanýarlar ýa-da olar rezin şlanglar bilen has uzak aralyklardan gaz çekip, gaz peçlerini ýakýarlar. Ýangyn howpsuzlygy bölümiň işgärleri gelip, muny ulanmagyň gadagandygyny we 1000 manat jerime ýazjakdyklaryny aýdýarlar. Garawullaryň aýlygy 700 manat bolansoň, dükan eýeleri barlagçylara 500-600 manat para berip, jerimeden gutulýarlar" diýip, ýerli telekeçi anonimlik şertinde aýtdy.

Ol bu ýagdaýyň her ýyl gaýtalanýandygyny belläp, "barlagçylara bir gezek para beren telekeçilere indiki ýyl güýz paslyna çenli azar berilmeýändigini" hem sözüne goşdy.

"Hökümet bizi gaz we elektrik peçlerinden peýdalanmaga mejbur edýär. Üstesine-de, döwlet işgärleriniň para almagyna şert döredýär. Eger ýyladyş ulgamy kadaly işleýän bolsa, onda ne biz goşmaça peçleri çekerdik, ne-de barlagçylar bizden para alyp bilerdi" diýip, telekeçi aýtdy.

Bilim işgärleriniň habarçymyza aýtmagyna görä, ýangyn howpsuzlygy işgärleri mekdepleriň ähli ýerine aýlanman, diňe mekdep ýolbaşçysynyň otagyna girmek bilen çäklenýärler. Munuň yz ýany, mekdep ýolbaşçylary ýygnak geçirip, her işgärden 50 manat pul ýygnap başlaýarlar.

"Ýaňy barlagçylara para berip, agyzlaryny bagladym. Eger şu edarada işläp, aýlyk aljak bolsaňyz, onda berlen paranyň öwezini dolup, şol puly bermeli bolarsyňyz" diýip, bir mugallym mekdep ýolbaşçysynyň aýdan sözlerini sitirledi.

Azatlyk ýokarda beýan edilen ýagdaýlar barada welaýat Polisiýa müdirliginiň Ýangyn howpsuzlygy bölüminden, şeýle-de bilim bölüminden goşmaça maglumat ýa kommentariýa alyp bilmedi.

Ýöne bu barlaglar prezident Serdar Berdimuhamedowyň 16-njy oktýabrda Ministrler Kabinetiniň mejlisini geçirip, paýtagt Aşgabatda we ýurduň ähli sebitlerinde ýyladyş möwsümine taýýarlyk işlerini hem-de ilatyň tok, gaz we agyz suwy bilen bökdençsiz üpjün edilmegini maslahat etmeginiň yz ýanyna gabat geldi.

“Gyş möwsüminde sarp edijileri we ilatly ýerleri elektrik energiýasy bilen ygtybarly üpjün etmek üçin anyk çäreler görüldi” diýip, TDH ýurduň Energetika ministrligine salgylandy.

Türkmenistanyň häkimiýetleri şeýle çykyşlary her ýylyň güýz paslynyň başynda ençeme gezek tekrarlaýarlar. Muňa garamazdan, Azatlyk her ýyl güýz-gyş möwsüminde ýurduň paýtagtynda we sebitlerde ýerleşýän durmuş desgalarynyň ýyladyş ulgamlarynda emele gelýän bökdençlikler barada yzygiderli habar berýär.

Türkmenistanyň döwlet metbugaty ýyladyş ulgamlarynda ýüze çykýan näsazlyklar, elektrik energiýasynyň hem-de tebigy gazyň üpjünçiliginde döreýän bökdençlikler barada habar bermeýär.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Forum

XS
SM
MD
LG