Aşgabatdaky Migrasiýa gullugynda pasport almak isleýänleriň uly nobatlary saklanýar. Şu günler nobatda duranlaryň uly bölegini pasportyň taýýarlanmagyna zerur dokumentleri tabşyrmak üçin öňünden talon alýanlar emele getirýär.
Paýtagtyň Migrasiýa gullugynda pasportyň taýýarlanmagy üçin zerur dokumentleri tabşyrmakçy bolýanlaryň sany ýüzlerçe adamdan geçýär.
Azatlyk Radiosyna gowşan wideoda dokument tabşyrmak üçin öňünden talon almakçy bolup, nobatda duranlaryň jaýynda 300 golaý adamy görmek mümkin.
Azatlygyň Aşgabatdaky habarçysy 14-nji martda Azady köçesinde ýerleşýän migrasiýa gullugyna ir sagat 7 töwereginde baranda bu ýerde eýýäm uly nobat döräpdir. Talonlar ir sagat 8-den 10-na çenli berlip, 40 golaý adama ýetmändir.
Şol gün berlen talonlar boýunça 23-25-nji mart aralygynda baryp, daşary ýurt pasporty üçin dokumentleri tabşyryp bolýar. Migrasiýa işgärleri dokumentler tabşyrylansoň, pasportyň 40-45 günde taýýar boljagyny duýdurdylar.
Habarçymyz şol gün taýýar pasportyny alanlaryň hem bolandygyny, pasport alan 3 adama duş gelendigini aýtdy.
Migrasiýa gullugy fewral aýynda daşary ýurt pasportyny bermegini wagtlaýyn bes edipdi. Şonda Balkan welaýatyndaky habarçymyz ýerli migrasiýa bölümlerde raýatlara pasport berilmegine emeli päsgelçilik döredilmegine tabşyrygyň bardygyny aýdan bolsa, Aşgabatdaky habarçymyz, ýerli resmi çeşmelere salgylanyp, pasport berilmegiň togtadylmagyny ýörite blanklaryň gutarandygy bilen düşündirip, elektron çipli biometriki pasportlaryň maý aýynda Germaniýadan gelmelidigini aýdypdy.
Habarçylarymyz bilen şu günki gün söhbetdeş bolanlaryň köpüsi özleriniň Türkiýä we Birleşen Arap Emirliklerine gitmek niýetiniň bardygyny aýdýarlar.
Türkmenistanlylaryň biometriki pasportlary almakdaky kynçylyklary, ýurtda dowam edýän agyr ykdysady kynçylyklaryň we işsizligiň arasynda gazanç üçin daşary ýurtlara gitmek isleýänleriň köpelen döwrüne gabat gelýär.
Şu aýyň başyndan bäri Lebap we Mary welaýatlaryndaky habarçylarymyz ýerli migrasiýa edaralarynda uly nobatlarynyň saklanýandygyny maglumat berýärler. Lebapdaky habarçymyz görä, sebitiň migrasiýa edarasynda biometriki pasport almak isleýänlere maý aýyna nobat berilýär.
Bu aralykda Türkmenistanyň Daşary işler ministrligi daşary ýurtlarda pasport möhletiniň uzaldylmagy boýunça alnyp barylýan çäreler barada habar berdi. Resmi habarda Türkmenistanyň daşary ýurtlardaky ilçihanalarynyň we konsullyklarynyň türkmen raýatlarynyň haýyşy boýunça möhleti gutarýan pasportlarda 2024-nji ýylyň aýagyna çenli bellik goýup, onuň möhletini uzaldýandygy aýdylýar.
Koronawirus pandemiýasy döwründe Türkmenistanyň daşary ýurtlardaky diplomatik bölümlerinde raýatlaryň pasportlaryny uzaltmak boýunça bu tejribäniň dowam edýändigi, şu wagta çenli daşary ýurtlardaky türkmen raýatlarynyň 200 000 töwereginiň pasport möhletiniň uzaldylandygy DIM-niň websaýtynda 13-nji martda çap edilen maglumatda aýdylýar.
Şol bir wagtda-da, Türkmenistanyň daşary ýurtlardaky diplomatik missiýalarynda, başga ýurtlardan tapawutlylykda, öz raýatlarynyň pasportlaryny täzelemek düzgüni, olara täze pasport bermek tejribesi göz öňünde tutulmaýar.
Bu ýagdaý ýüzlerçe müň türkmen raýatynyň daşary ýurtlarda dokumentsiz, bikanun hem haksyz galmagyna getirdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum