Şweýsariýanyň Ženewa şäherinde Orsýet bilen Ukrainanyň arasyndaky gepleşikleriň ikinji güni iki sagat töweregi wagt dowam edenden soň togtadyldy, iki ýurduň resmileri gepleşikleriň "kyn" bolandygyny aýtdylar.
18-nji fewralda gepleşikler tamamlananda Moskwanyň baş gepleşikçisi Wladimir Medinskiý Orsýetiň döwlet metbugatyna beren interwýusynda gepleşikleriň "kyn, ýöne işewür" bolandygyny we mundan beýläk-de duşuşyklaryň geçiriljekdigini aýtdy.
Onuň bu sözleri Ukrainanyň prezidenti Wladimir Zelenskiniň gepleşikleriň ikinji güni tamamlanmazdan biraz öň sosial mediada ýazan ýazgysyna gabat geldi.
"Düýnki duşuşyklar hakykatdanam kyn boldy we biz Orsýetiň eýýäm soňky tapgyra ýetip biljek gepleşikleri uzaltmaga synanyşýandygyny aýdyp bileris" diýip, Zelenskiý ýazdy.
Bir gün öň Ak Tamyň Ženewadaky baş wekili Stiw Witkoff "manyly öňegidişligiň" bolandygyny aýtdy.
"Iki tarap hem öz liderlerini habarly etmek we ylalaşyga tarap işlemegi dowam etdirmek barada ylalaşdylar" diýip, ol X-da ýazan habarynda aýtdy.
17-18-nji fewralda Ženewada bolan duşuşyklar - soňky aýyň dowamynda geçirilen üçtaraplaýyn gepleşikleriň üçünji tapgyry bolup, urşuň soňlanmagynyň öňündäki iň çylşyrymly iki päsgelçilik: territorial talaplar we howpsuzlyk kepillikleri meselesine bagyşlandy.
Bu duşuşyklar iki tarapdan hem 2 milliona golaý adamyň ölümine ýa-da ýaralanmagyna sebäp bolan doly möçberli rus çozuşynyň dört ýyllygyndan bir hepde öň geçirilýär.
ABŞ-nyň ýolbaşçylygyndaky tagallalar 2022-nji ýylyň 24-nji fewralynda başlanan çozuşyň soňky aýlarynda mundan öňki döwürlere garanda has öňe gitdi.
Şeýle-de bolsa, Orsýet Kiýewiň gündogar Donbas sebitinde henizem saklaýan territoriýasyndan el çekmegini öz içine alýan berk talaplaryndan yza çekilmekde az meýil görkezdi.
Şol bir wagtyň özünde, Ukraina Waşingtony we Ýewropaly ýaranlaryny Orsýetiň geljekki agressiýasyndan goranmaga kömek etjek berk howpsuzlyk kepilliklerini soraýar.
Ruslar "maksimal talaplaryna haýsydyr bir üýtgeşiklik girizmäge taýýardygyna hiç hili alamat bermediler" diýip, ABŞ-nyň Ukrainadaky öňki ilçisi William Teýlor Azatlyk Radiosyna aýtdy.
Ol atyşyk bes edilmese, giň ylalaşyklaryň hakykatdanam mümkin däldigini aýtdy.
"Hemme zat söweşiň bes edilmegine bagly" diýip, Teýlor aýtdy.
Zelenskiý 17-nji fewralda "Bloomberg" agentligine beren interwýusynda ok atyşygyň bes edilmegine gözegçilik meselesiniň -de - eger ylalaşyga gelinse - ara alnyp maslahatlaşylýandygyny aýtdy.
"Ruslar territoriýalar baradaky garaýyşlary we 'islendik barlyşyga taýýarlygy' bilen gaýdyp gelmelidi" diýip, Zelenskiý sitirlendi.
Gepleşikleriň öňüsyrasynda Orsýet Ukrainanyň şäherlerine we ilatly ýerlerine ýene-de dronlar we raketalar bilen zarba urdy, ýaşaýyş jaýlaryny we energiýa infrastrukturasyny nyşana aldy. Russiýanyň elektrik stansiýalaryny we elektrik geçirijilerini bombalamagy netijesinde millionlarça ukrainaly ýylylyk we elektrik energiýasynyň kesilmeginden ejir çekdi.
Orsýetiň dowam edýän hüjümleri gepleşikleriň çynlakaý däldigini görkezýär diýip, Teýlor aýtdy.
ABŞ-nyň Ukrainadaky başga bir öňki ilçisi Stiwen Paýfer Orsýetiň iki tarapyň arasyndaky düýpli tapawutlary azaltmak üçin däl-de, esasan göz üçin gepleşik geçirýän bolmagy mümkin diýip belledi.
"Olar taraplaryň arasyndaky tapawutlary azaltmaga kömek edip biljek täze bir zat getirýärlermi?" diýip, ol sorady.
"Umuman aýdylanda, gepleşikleriň geljegine şübheli garaýaryn" diýip, Paýfer Azatlyk Radiosyna aýtdy.