ABŞ-nyň döwlet sekretarynyň Günorta we Merkezi Aziýa işleri boýunça kömekçisi S. Pol Kapur 3-nji noýabrda Aşgabatda Halk Maslahatynyň başlygy Gurbanguly Berdimuhamedow bilen duşuşdy. Şol gün Kapur Türkmenistanyň daşary işler ministri Raşit Meredow bilen bilelikde ýyllyk türkmen-amerikan syýasy geňeşmelerine ýolbaşçylyk etdi.
ABŞ-nyň Döwlet departamentiniň Günorta we Merkezi Aziýa işleri boýunça býurosynyň X hasabynda çap edilen beýanatynda, Kapur Samarkantdaky “C5+1” ministrler duşuşygynyň garaýyşlaryndan ugur alyp, söwda, maýa goýumlary, Hazarüsti arabaglanyşyk, bilim we medeni alyş-çalyş hem-de beýleki ugurlarda hyzmatdaşlygy has-da çuňlaşdyrmak meseleleriniň ara alyp maslahatlaşylandygyny aýtdy. Kapur 2025-2026-njy ýyllarda "C5+1" Sekretariatynyň egindeş başlygy hökmünde görkezen liderligi üçin Türkmenistana minnetdarlyk bildirdi.
Türkmenistanyň Daşary işler ministrliginiň (DIM) maglumatyna görä, ministrligiň binasynda geçirilen geňeşmelerde energetika we ulag ugurlaryndaky hyzmatdaşlyk, şeýle-de iki ýurduň işewürleriniň arasyndaky gatnaşyklary giňeltmek barada-da pikir alşyldy.
DIM-niň 4-nji noýabrda çap eden aýratyn habaryna görä, Gurbanguly Berdimuhamedow Kapur bilen duşuşygynda energetika we ulag ulgamlarynda hyzmatdaşlygy giňeltmegiň mümkinçilikleri barada aýtdy. Ol Türkmenistan-Owganystan-Pakistan-Hindistan (TOPH) gaz geçirijisiniň taslamasyna ABŞ-nyň berýän goldawyna ýokary baha berdi.
Samarkantdaky “C5+1” duşuşygy 19-njy oktýabrda ABŞ-nyň döwlet sekretary Marko Rubionyň we Merkezi Aziýanyň bäş ýurdunyň daşary işler ministrleriniň gatnaşmagynda geçirilipdi. Şol gün Rubio bilen Meredow aýratyn duşuşyp, öňde boljak syýasy geňeşmeleriň tertibini kesgitläpdi.
ABŞ-Türkmenistan Işewürler geňeşi amerikan işewürler toparynyň Aşgabada saparyny 4-5-nji noýabra meýilleşdirdi. Geňeşiň maglumatyna görä, bu sapar ABŞ-nyň Döwlet departamenti bilen utgaşdyrylyp guralýar.
Forum