Türkmenistanyň çakylygy boýunça Aşgabada baran Garaşsyz döwletleriň arkalaşygy (GDA) guramasynyň missiýasy ýurduň prezidentlik saýlawlaryna gözegçilik etmek işine başlady diýlip, media serişdelerinde habar berildi.
GDA-nyň missiýasynyň synçylarynyň Türkmenistanyň Merkezi saýlaw komissiýasynyň ýardamy bilen Aşgabatda öz ştabyny açandygy aýdylýar.
Türkmenistanyň prezidentlik saýlawlary 12-nji fewralda geçiriler.
Türkmenistanyň 2016-njy ýylda kabul edilen Baş kanuna laýyklykda prezident ýedi ýyllyk möhlet bilen saýlanýar. Merkezi saýlaw komissiýasy jemi 9 dalaşgäri hasaba aldy. Saýlawlara birinji gezek üç syýasy partiýanyň dalaşgärleri gatnaşýarlar. Demokratik partiýasyndan ýurduň häzirki prezidenti Gurbanguly Berdimuhamedow prezidentlik wezipesine üçünji gezek dalaş edýär.