Özbegistanly žurnalist we öňki prezident Yslam Kerimowyň ýegeniniň 10 ýyl çemesi wagtdan soň ruhy hassahanadan boşadylandygy Ýewropada Howpsuzlyk we Hyzmatdaşlyk Guramasynyň (ÝHHG) maglumatynda aýdylýar.
1-nji martda çap bolan beýannama görä, ÝHHG-niň media azatlygy boýunça wekili Dunja Mijatowiç Jamşid Kerimowyň boşadylmagyny makullady. ÝHHG-niň maglumatynda Kerimowyň haçan boşadylandygy aýdylmady.
Bu barada Özbegistanyň hökümetinden maglumat bolmady.
Şeýle-de Kerimowyň maşgalasy agzalmady. Emma mälim bolşuna görä, Jamşid Kerimow 25 ýylyň dowamynda Özbegistany dolandyran we 2016-njy ýylda ýogalan Yslam Kerimowyň ýegeni.
49 ýaşly Jamşid Kerimow özbek hökümetini we Jizzak regionynyň häkimiýetlerini tankytlap ýazan makalalary bilen tanymal. Ol 2011-nji ýylda boşadylypdy, emma yzýany gaýtadan ruhy hassahana ýerleşdirilipdi.
Şeýle-de ÝHHG-niň media azatlygy boýunça wekili Mijatowiç özbek häkimiýetlerini tussaglykdaky žurnalistleri boşatmaga çagyrdy.