Lawrow ABŞ-nyň diplomatiki missiýalary ýapmak talabyny seljerýändiklerini aýdýar

Rus daşary işler ministri Sergeý Lawrow Moskwanyň Waşingtonyň Russiýanyň ABŞ-daky üç diplomatik missiýasyny ýapmak baradaky talabyny öwrenýändigini we mundan soň degişli jogap berjekdigini aýtdy.

“Bize jikme-jik nota düýn agşam gowuşdy. Biz ony öwrenýäris. Seljermelerden soň degişli jogap beriler” diýip, Lawrow 1-nji sentýabrda çykyş etdi.

ABŞ-nyň Döwlet departamenti 2-nji sentýabra çenli möhlet berip, Russiýanyň San Fransiskodaky konsulhanasyny, şeýle-de Waşingtondaky we Nýu-Ýorkdaky başga-da iki diplomatik missiýasyny ýapmagy tabşyrdy.

Bu Moskwanyň 28-nji iýulda ABŞ-nyň Russiýadaky diplomatlarynyň sanyny 1-nji sentýabra çenli 755 adam azaldyp, 455-e çenli ýetirmek talabynyň yz ýanyna gabat geldi. Rus resmileri bu kararyň ABŞ-nyň Moskwa garşy sanksiýalary güýçlendirmegine jogap hökmünde kabul edilendigini aýtdy. Waşington Kremliň ABŞ-nyň 2016-njy ýyldaky prezidentlik saýlawlaryna goşulandygy baradaky aýyplamalaryň esasynda, Russiýa goşmaça gadagançylyklary girizipdi.

Lawrow ABŞ-ny ar alyjy diplomatiki ädimleri etmekde aýyplady. Emma, gönümel prezident Donald Trampy ýa-da onuň administrasiýasyny aýyplamakdan saklandy.