Sepleriň elýeterliligi

Soňky habar

Türkmenistanly bir aýal gyzyl gaçakçylygynda aýyplanyp Deliniň aeroportunda saklandy


Hindistanyň Indira Gandi adyndaky halkara aeroportyň howpsuzlyk işgäri. Illýustrasiýa suraty

Türkmenistanly bir zenan maşgala bahasy 4 million 100 müň hindi rupisine barabar, ýagny takmynan 61 müň dollar möçberindäki altyny bikanun ýollar biler Hindistanyň çägine saljak bolanda tussag edildi diýip, internetde peýda bolan habarlarda hindistanly resmileriň 31-nji maýda çap eden maglumatlaryna esaslanyp habar berilýär.

Günä bildirilýän 43 ýaşly türkmenistanly penşenbe güni Stambuldan Delä gelende gümrük gullugynyň işgärleri tarapyndan saklanýar.

“Ýolagçynyň bagažynyň we şahsy maglumatlarynyň jikme-jik barlanmagynyň netijesinde biri-birine sepleşdirilen köp sanly altyn ýüzük tapyldy. Ýüzükler biri-birine dakylyp, olardan altyn zynjyr ýasalypdyr. Zynjyryň jemi agramy 1.3 kilograma barabardyr. Ýolagçy zynjyry boýnuna dakynypdyr” diýlip, Gümrük gullugynyň beýanatynda aýdylýar.

Beýanatda ele salnan gyzylyň bazar bahasynyň takmynan 41.03 laha, ýagny 60 müň amerikan dollaryna barabardygy, saklanan ýolagçynyň Türkmenistanyň raýatydygy we onuň tussag edilendigi bellenýär.

Mundan ozal, 4-nji maý güni onlarça türkmen raýaty Deliniň Indira Gandi adyndaky halkara aerportunda birmeňzeş aýyplama esasynda tussag edilipdi. Şonda tussag edilenleriň 22-siniň aýal maşgaladygy habar berlipdi.

Olaryň ýanyndan ýolagçy jarnamasynda görkezilmedik, ýagny bikanun geçirilmäge synanyşylan altyn şaý-sepler tapylypdy.

Aýyň başynda howa menzilinde saklanan türkmenistanly aýallaryň biri öz ujypsyz altynyny sumkasynda gizläp geçirmäge synanyşýar, olaryň beýlekisi gyzyllaryny altyn zynjyr görnüşinde geçirjek bolýar.

Şonda gümrükçiler ýaşyl zolakdan geçmekçi bolan has kän altynly türkmenistanlylary saklaýar. Olaryň her haýsysynyň öz ýanlary bilen bikanun ýollar arkaly gümrükden geçirmäge synanyşan altynlarynyň agramy 600 gramdan 1 kilogram aralykda bolup çykýar. Iki sagadyň içinde Türkmenistandan gelýän 28 ýolagçy saklanyp, olaryň ýanyndan gaçak ýollar bilen geçirilmäge synanyşylan takmynan 17,5 kilogramlyk altyn tapylýar.

Ýurduň gümrük resmileri türkmenistanly ýolagçylaryň Hindistana esasan Türkiýäniň we Türkmenistanyň howa ýollaryna degişli uçar gatnawlarynda sapar edýändigini belleýär.

Metbugat habarlaryndan mälim bolşuna görä, penşenbe güni howa menzilinde saklanan türkmenistanly zenan hem mundan ozalky saklanan türkmenistanly altyn gaçakçylarynyň tärine eýeripdir.

Türkmenistanyň syýasy durmuşyny ýakyndan yzarlaýan halkara synçylar ýurduň garaşsyzlyk ýyllaryndaky iň agyr ykdysady krizisi başdan geçirýändigini aýdýar.

Mundan ozal, Bakuwyň Halkara deňiz portunyň gümrük gullugynyň işgärleriniň gaçak görnüşde Azerbaýjana gyzyl geçirmekçi bolan türkmen raýatlaryny saklandygy barada maglumatlar peýda bolupdy.

Maglumat üçin aýdylsa, Türkmenistanda dowam edýän ykdysady krizisiň fonunda, ýurduň “gara bazarlarynda” 1 amerikan dollarynyň bahasynyň 25 manada ýetendigi habar berilýär.

Siziň pikiriňiz

Teswirleri görkez

XS
SM
MD
LG