Mary welaýatynda azyk söwdasyny edýän kiçi telekeçiler şu ýyl baýramçylyk günlerinde söwdanyň juda pes bolandygyny we özleriniň uly maddy zyýan çekendiklerini aýdýarlar. Olar müňlerçe kilogram möçberindäki azyk önümleriniň geçmän galandygyny we olaryň çüýräp zaýa bolandygyny hem belleýärler.
"Her ýyl bolşy ýaly kiçi telekeçiler Täze ýyl baýramynda satmak üçin ýüzlerçe kilogram möçberinde alma, mandarin, banan, üzüm ýaly gök-bakja önümlerini satyn aldylar. Ýöne bu ýyl söwda juda pes boldy. Biziň baýramçylyk günlerinde satmak üçin alan harytlarymyzyň ýarysyna golaýy hem satylmady. On müňlerçe manat möçberinde zyýan çekdik" diýip, maryly telekeçi anonimlik şertinde Azatlyk Radiosynyň habarçysyna gürrüň berdi.
Başga bir telekeçi baýramçylyk günlerinde satmak üçin 500 sany gawun satan alandygyny, ýöne onuň diňe 20-den gowragyny satyp bilendigini aýtdy.
Telekeçileriň sözlerine görä, öňki ýyllarda ýaşaýjylar alma we mandarin ýaly önümleri gutulap satyn alýardylar. Bu ýyl köp adam bu önümleri 2-3 kilogramdan artyk satyn almady.
"Halkyň maddy ýagdaýy şu ýyl has-da peselene meňzeýär. Käbir adamlar alma we mandarin ýaly önümlerinden däneläp, ýagny diňe iki ýa üç sany satyn aldy. Köp adam bolsa, döwletiň döreden göçme söwda nokatlaryndan söwda etdi. Bu ýerde azyk önümleri birnäçe esse arzan bahadan satyldy" diýip, telekeçi belledi.
Söwdanyň pesligi zerarly telekeçileriň geçmän galan müňlerçe kilogram möçberindäki azyk harydy çüýräp zaýa boldy. Şu günler olar bu önümleri mal iými hökmünde zyýanyna satyp başladylar.
"Çüýrän gök-bakja önümlerimizi iri we ownuk mallar üçin iým satylýan ammarlara eltýäris. Bu ýerde bu önümleri gaty arzan bahadan, meselem, bir kilogram almany 1 manatdan, käşiri 70 teňňeden mallar üçin satýarys" diýip, başga bir maryly telekeçi anonimlik şertinde aýtdy.
Onuň sözlerine görä, mallar üçin satylýan çüýrän önümleriň hyrydarlarynyň arasynda maddy ýagdaýy pes bolan hojalyklar hem bar. Olar bu ammarlara elleri haltaly gelip, çagalary bilen iýmek üçin alma we mandarin ýaly önümleri saýlap alýarlar.
Türkmenistanyň ilaty bäş ýyldan gowrak wagt bäri agyr ykdysady krizis şertlerinde ýaşaýar. Raýatlar işsizlikden we iýmit ýeter-ýetmezçiliginden we gymmatçylygyndan kösenýärler.
Häkimiýetler munuň bilen bagly ilatyň ýüzbe-ýüz bolýan kynçylyklary barada resmi derejede hiç zat aýtmaýarlar.
Muňa derek, olar geçen hepde ýurduň dürli künjeginde azyk önümlerini bazar bahasyndan arzan satýan göçme söwda nokatlaryny döredip, baýramçylyk günlerinde ilaty hoşal etmäge çalyşdylar.
Baýramçylyk saçagynyň aladasyny eden ýaşaýjylar çäkli möçberde satylan bu önümlerden satyn almak üçin daňdan söwda nokatlaryna baryp, ençeme sagat nobatda garaşmaly boldular. Mary we Balkan welaýatlarynda arzan azyk önümleriň üstünde ýakalaşyk hem boldy.
Häkimiýetleriň bu emeli azyk bolçulygy we arzançylygy hem uzaga çekmedi. Täze ýylyň birinji hepdesiniň ahyryna çenli hem saklanmadyk bu göçme söwda nokatlary şu hepdäniň başynda boşap galdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum