Türkmenistanyň prezidenti Özbegistanyň işewürlerini Türkmenistan-Owganystan-Pakistan-Hindistan (TOPH) gazgeçiriji proýektine goşulmaga çagyrdy.
Gurbanguly Berdimuhamedowyň bu teklibini Aşgabatda Özbegistanyň premýer-ministri Abdylla Aripow bilen geçiren gepleşiginde öňe sürendigini TDH döwlet habar agentligi mälim etdi. Şeýle-de, Özbegistana Türkmenistanyň Hazar deňzindäki nebit-gaz ýataklaryny özleşdirmäge gatnaşmagyň hödürlenendigiaýdylýar.
Türkmenistandan tebigy gazy Owganystanyň üstünden Pakistana we Hindistana akdyrmak boýunça gaz geçirijini gurmak barada bu dört ýurduň arasynda 2015-nji ýylda gol goýlan ylalaşyga görä, umumy uzynlygy 1814 kilometrlik gazgeçiriji arkaly ýylda 33 milliard kubometr gaz akdyrylar.
Özbegistanyň TOPH proýektiniň operatory bolup biljekdigini 14-nji iýunda “Özbeknebitgaz” kompaniýasynyň başlygy Alişer Sultanow mälim etdi.
“Türkmen tarapyndan TOPH-a goşulmak hakynda teklip edildi” diýip, Kommersant.uz Sultanowy sitirledi.
Özbegistanyň “Özbeknebitgaz” kompaniýasynyň azerbaýjanly we türkmenistanly kärdeşleri bilen bilelikde Hazar deňziniň suwasty giňişliklerinde bilelikdäki proýektleriň birnäçesini amala aşyrmagy planlaşdyrýandygy habar berilýär.