Sepleriň elýeterliligi

Soňky habar

Watana dolanan haj zyýaratçylary Türkmenabatda karantine alyndy


Arhiwden alnan illýustrasiýa suraty
Arhiwden alnan illýustrasiýa suraty

Türkmenistandan Saud Arabystanyna haj zyýaratyna giden türkmen raýatlary 22-nji iýulda ýurda dolandylar we dessine karantin zonasyna ýerleşdirildiler. Bu barada Azatlyk Radiosynyň ygtybarly çeşmeleri habar berýärler.

Haj zyýaratçylaryny getiren uçar günüň ikinji ýarymynda, öýlän wagty Lebap welaýatynyň dolandyryş merkezi Türkmenabat şäheriniň aeroportuna gondy.

Aeroportdaky ygtybarly çeşmämiziň maglumatyna görä, 275 sany haj zyýaratçysy uçardan düşen badyna, goş-golamlary berlenden soň, Türkmenabadyň baş karantin zonasyna ýerleşdirildi.

"Olar bu ýerde ýedi gün karantinde saklanýarlar" diýip, çeşmämiz aýtdy.

Türkmenistanda koronawirusyň ýokdugyny erjellik bilen öňe sürýän türkmen häkimiýetleri pandemiýa sebäpli girizilen karantin çäklendirmelerini belli bir derejede gowşadan bolsa-da, daşary ýurtlardan gelen ýolagçylary ýedi gün möhlet bilen karantinde saklamak düzgünlerini öz güýjünde saklaýarlar.

Şu ýyl Türkmenistandan 275 adam 2-22-nji iýul aralygynda Saud Arabystanynda haj zyýaratynda boldy. Türkmenistanyň prezidentiniň 23-nji iýunda gol çeken permanyna görä, ýurduň Ministrler Kabinetiniň ýanyndaky Ulag we kommunikasiýalar agentliginiň “Türkmenhowaýollary” agentligine zyýaratçylary Saud Arabystany Patyşalygyna eltmek we yzyna getirmek üçin agentligiň öz serişdeleriniň hasabyna ýörite gatnawy guramak tabşyryldy.

Türkmenistanyň döwlet telewideniýesi we köpçülikleýin habar beriş serişdeleri haj zyýaratçylarynyň Saud Arabystanyna gidendigi baradaky maglumatlary 2-nji iýulda ilat köpçüligine ýetirdiler. Ýöne türkmenistanly zyýaratçylaryň 22-nji iýulda ýurda dolanandygy barada heniz habar bermediler.

Aşgabadyň aeroportundaky ygtybarly çeşmämiziň maglumatyna görä, türkmen mediasy haj zyýaratçylarynyň ýurda dolanandygy barada olaryň karantin möhleti tamamlanandan soňra habar bermegi meýilleşdirýär.

"Haj zyýaratçylary 28-nji iýulda Türkmenabadyň aeroportundan Aşgabada uçarlar. Olar Aşgabadyň halkara aeroportuna baranda, telewideniýä ýazgy düşüriler we "Watan" habarlary gepleşiginde haj zyýaratçylarynyň Saud Arabystanyndan ýurda dolanandygy görkeziler" diýip, çeşmämiz belledi.

Azatlyk bu aýdylanlar barada Türkmenabadyň we Aşgabadyň aeroportlaryndan hem-de “Türkmenhowaýollary” agentliginden goşmaça maglumat ýa kommentariýa alyp bilmedi.

Türkmenistanly haj zyýaratçylary iki ýyl arakesmeden soň, has takygy 2019-njy ýyldan bäri ilkinji gezek Saud Arabystanynda bolup, haj parzyny berjaý etdiler. Saud Arabystany soňky iki ýyl bäri dowam edýän pandemiýa zerarly daşary ýurtlardan zyýaratçy kabul etmegi wagtlaýyn togtadypdy. Geçen ýyl patyşalyk haj zyýaratyny diňe sanjym edilen ýerli ilata elýeterli edipdi.

Dünýewi döwlet bolan Türkmenistan garaşsyzlygyny alany bäri ýylda diňe çäkli zyýaratçyny, takmynan 150-280 adamy döwlet ýardamy bilen haj parzlaryny berjaý etmäge iberip gelýär.

Ýöne Saud Arabystanynyň türkmenistanly zyýaratçylaryň sany boýunça kesgitlän kwotasynyň birnäçe müň adamdan ybaratdygy habar berilýär. Hökümetçi "TurkmenPortal" neşiri aprelde Saud Arabystanynyň bu ýyl Türkmenistana 2 müň 83 haj kwotasyny berendigini habar berdi.

Galyberse-de, habarçylarymyz Türkmenistanda haj zyýaratynyň guramaçylygynyň töweregindäki para-berim barada hem her ýyl diýen ýaly habar berýärler.

17-nji iýunda haj zyýaratyna dalaşgär bir türkmenistanly “...zyýarata dalaşgärleriň sanawyna goşulmak üçin din resmileriniň, araçylaryň üsti bilen, özünden ilki “3 müň dollar, soňra 4-5 müň dollar möçberinde” “töleg” sorandygyny gürrüň beripdi.

Şu aýyň başynda Azatlygyň habarçylary we çeşmeleri Lebap welaýatyndan haj zyýaratyna 44 raýatyň iberilendigini we olaryň aglabasynyň öňki wezipeli resmilerdigini ýa-da telekeçilerdigini anykladylar.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

XS
SM
MD
LG