Russiýa öten giň gerimli dron hüjümini amala aşyrdy, ukrain howa goragçylarynyň umuman köpüsiniň öňüni alandygyna garamazdan, pilotsyz uçarlardan urlan zarbalar azyndan üç adamy öldürdi diýip, ukrain harbylary 22-nji martda, Donetsk sebitindäki Bahmut şäheriniň üstünde barýan agyr söweşleriň dowam edýän wagtynda aýtdy.
Birnäçe sagat dowam eden howa hüjümi duýduryşy ýarygije Kiýewde we birnäçe sebitde yglan edildi.
Kiýew şäher harby administrasiýasy Kiýew sebitine edilen gijeki hüjümde üç adamyň ölendigini, ýedi adamyň ýaralanandygyny aýtdy.
"Kiýew sebitinde pilotsyz uçarlaryň eden gijeki hüjümi netijesinde bir raýat desgasyna zyýan ýetdi. Şu wagta çenli üç adamyň ölendigini we ýedi adamyň ýaralanandygyny bilýäris. Maglumat barlanylýar” diýip, administrasiýa telegramda aýtdy.
"22-nji mart gijesinde duşman [Eýranda öndürilen] "Şahid-136 "pilotsyz uçarlary bilen ýene bir uly howa zarbasyny urdy" diýip, Ukrainanyň Ýaragly güýçleriniň baş ştaby gündelik hasabatynda aýtdy.
"Başlangyç maglumata görä, duşmanyň 21 pilotsyz uçarynyň 16-sy goragçylarymyz tarapyndan ýok edildi" diýip, Baş ştab howa zarbalary wehiminiň bütin Ukraina boýunça ýokary bolmagynda galýandygyny hem sözüne goşdy.
Demirgazyk Žitomyr sebitinde edilen dron hüjümi infrastruktura desgasyna zeper ýetirdi diýip, sebit harby dolandyryş gullugynyň başlygy Witaliý Buneçko telegramda aýtdy.
"Howa goranyş bölümleri duşmanyň üç sany pilotsyz uçaryny urup gaçyrdy” diýip, Buneçko bu ýerde adam pidasynyň bolmandygyny aýtdy.
Howa duýduryşlary wagtynda Ukrainanyň günbataryndaky Hmelnitskiý şäherinde partlama boldy, ýöne ýerli häkimiýetler soň sebitiň üstünde pilotsyz uçarlaryň görünmändigini aýtdylar.
Ukrain güýçleri gündogarda soňky 24 sagadyň dowamynda 114 hüjümi yzyna serpikdirdi, esasy üns Bahmutda jemlendi, rus goşunlary şäheriň merkezine tarap öňe süýşmäge synanyşýar diýip, baş ştab aýtdy.
Häzir esasan harabalyga öwrülen Bahmut, bir aýlap dowam eden agyr söweşleriň merkezi bolup, iki tarapyň hem agyr ýitgi çekmegine sebäp bolýar. Şol bir wagtda analitikler bu şäheriň o diýen uly strategiki ähmiýetiniň ýokdugyny aýdýarlar.
Sewastopolda, Russiýa tarapyndan basylyp alnan Krymda Moskwa tarapyndan bellenen häkimiýetler Gara deňiz portunyň Russiýanyň Gara deňiz flotunyň ýerleşýän çäginde parom gatnawynyň togtadylýandygyny yglan etdiler. Sewastopolyň Moskwa tarapyndan bellenen häkimi Mihail Razwoýaýew biraz öň şäheriň howa goragçylarynyň ukrain pilotsyz uçarlarynyň guran hüjümini yzyna serpikdirendigini aýtdy.
Emma bu maglumat garaşsyz ýagdaýda tassyklanyp bilinmedi we Ukraina aýdylýan hüjüm barada hiç hili düşündiriş bermedi.
21-nji martda, Ýaponiýanyň premýer-ministri Kiýewde, goldawyny görkezmek üçin, ukrain prezidenti Wolodymyr Zelenski bilen duşuşdy. Bu duşuşyk Hytaýyň prezidenti Si Szinpiniň Moskwa eden saparyna gabat geldi.
Ýaponiýanyň Daşary işler ministrligi bir gün öň premýer-ministr Fumio Kişidanyň Zelenski bilen gepleşik geçirmek üçin Kiýewe barjakdygyny aýtdy.
Ýapon telewideniýesi premýer-ministriň Polşanyň serhetýaka Przemysl şäherinde otla münendigini görkezdi, Zelenski bolsa Kişidany garşylaýan wideosyny çap edip, ony "halkara düzgüniniň hakyky güýçli goragçysy we Ukrainanyň uzak wagtlyk dosty" diýip atlandyrdy.
Kişida Kiýewiň daşyndaky Buça şäherine hem gördi, şäher häkimi oňa geçen ýyl rus güýçleriniň bu ýerde 400 parahat ýaşaýjyny öldürendigini aýtdy. Kişida bir pursat dymyp we baş egip, merhumlary hatyralamazyndan öň ybadathananyň daşynda gül çemenini goýdy.
Kişidanyň Zelenski bilen duşuşygy Ýaponiýanyň maý aýynda Ýediler toparynyň (G7) sammitini geçirmäge taýýarlyk görýän wagtynda boldy.
Ýapon ýolbaşçysy bu sammitiň Moskwanyň 2022-nji ýylyň fewralynda başlan sebäpsiz urşy zerarly, Russiýanyň Ukraina goşun sürmegine garşy durmak bilen, halkara tertibiniň we kanunçylygyň hökmürowanlygynyň goralmagy barada berk yşarat ibermelidigini aýtdy.
Zelenski, Kişidanyň çakylygyndan soň, G7 sammitine onlaýn arkaly gatnaşjakdygyny aýtdy.
Forum