Sepleriň elýeterliligi

Soňky habar

Türkmenistanyň Stambuldaky konsullygynda pasportlary täzelejek bolýanlaryň uly nobatlary saklanýar


Stambuldaky türkmen konsullygynyň öňündäki nobat, 2022-nji ýylyň iýun aýy. TikTok ulagymyndan alnan surat
Stambuldaky türkmen konsullygynyň öňündäki nobat, 2022-nji ýylyň iýun aýy. TikTok ulagymyndan alnan surat

Türkmenistanyň Stambuldaky konsullygynyň öňünde ullakan nobatlar saklanýar. Türkmenistanyň raýatlary binanyň öňünde köpçülikleýin ýygnanyp, möhleti geçen pasport problemasyny çözmek üçin birnäçe günläp nobata durmaly bolýarlar.

Türkmenistan Türkiýedäki raýatlarynyň möhleti geçen pasportlaryny uzaldýar. Şu sebäpden her gün ýüzlerçe adam irden konsullygyň binasyna ýygnanýarlar we edaranyň kabul ediş wagty gutarýança nobatyna garaşýar.

Azatlyk Radiosynyň Stambuldaky habarçysynyň sözlerine görä, häzir pasportlaryň möhleti soňky ýyllarda möhleti geçen biometrik pasportlaryna eýe bolan raýatlar üçin uzaldylýar. Habarçysy Mansur Magomedowyň habaryna görä, raýatlaryň ellerindäki pasportlarynyň geçen möhleti 2024-nji ýyla çenli uzaldylýar. Paportynyň möhletini uzaldyp bilenleriň arasynda dokumentleri 2020-nji, 2022-nji we 2019-njy ýyllarda gutaran adamlar bar. Köne pasportlara olaryň möhletiniň 2024-nji ýyla çenli uzaldylandygyny görkezýän möhür basylýar.

Habarçynyň sözlerine görä, biometrik pasporty bolmadyk we köne türkmen pasportlary bilen Türkiýede ýaşaýan Türkmenistanyň raýatlaryna bolsa, watanyna uçmaga mümkinçilik berýän kagyz berilýär, olar soň ýurduna aşansoň pasport almak üçin ýaşaýan ýerindäki Migrasiýa gullugyna ýüz tutmaly bolar.

Pasport meselesi soňky onýyllykda türkmen raýatlary üçin iň agyr mesele bolmagynda galýar. 2009-njy ýylda Türkmenistan tarapyndan täze biometrik pasportlar girizilenden soň, daşary ýurtda bolan ýüzlerçe müň türkmen raýaty täze pasport alyp bilmedi we bikanun ýagdaýda galdy. Türkiýe iň köp türkmen migrantynyň ýaşaýan ýurdy hasaplanýar. Resmi sanlara görä, Türkiýede 241 müň türkmen raýaty ýaşaýar, garaşsyz çeşmelere görä, hakyky san birnäçe esse köp.

Türkmenistan şu çaka çenli öz raýatlaryna daşary ýurtlarda pasport bermedi.

Türkmenistanyň daşary ýurtlardaky ilçihanalarynda raýatlaryň möhleti geçen biometrik pasportlarynyň möhletini uzaltmagyň tertibi 2021-nji ýylyň iýul aýynda tassyklandy. Türkmenistanyň Stambuldaky konsullygy şu ýylyň başynda biometrik pasportlary täzeläp başlady, şonda pasportlaryň geçen möhleti 2023-nji ýylyň iýunyna çenli uzaldyldy.

Türkmen raýatlarynyň ýat ýurtda uzak wagtlap bikanun ýagdaýda galmagy we maddy kynçylyklary olaryň Türkmenistana gitmegine päsgel berdi. Koronawirus pandemiýasy we adaty uçar gatnawynyň ýatyrylmagy türkmenistanlylaryň ýagdaýyny hasam kynlaşdyrdy we ýurduň raýatlaryny hem ýurduna gitmek mümkinçiliginden, hem-de dokumentden mahrum etdi.

Habarçynyň belleýşi ýaly, türkmen raýatlarynyň Stambuldaky konsullygyň öňündäki uly nobatlary meseläniň gerimini we näçe adamyň dokumentsiz kösenýändigini görkezýär.

Maý aýynyň başynda, Türkmenistanyň hökümeti koronawirus pandemiýasynyň dowamynda girizen çäklendirmelerini ýeňilleşdirmek we iki halkara ugry boýunça uçuşlary dowam etdirmek kararyny yglan etdi.

30-njy maýdan Dubaýa (BAE) we 1-nji iýundan Gazana yzygiderli gatnawlar bölekleýin dikeldildi.

Dubaýyň üstünden geçýän ýol türkmen raýatlaryna Türkmenistana aşmak üçin köpden bäri garaşylan mümkinçilik boldy. Azatlygyň habarçylary biletleriň bahasynyň gaty ýokarydygyna garamazdan, uçarlara talabyň ýokarydygyny habar berýärler.

Habarçymyz Mansur Magomedow Dubaýyň üsti bilen Türkmenistana gitmegiň bahasynyň ortaça 1700 amerikan dollaryna durýandygyny aýdýar. Bu puldan 250-300 dollar Türkiýeden Dubaýa uçar biledine, ýene 150 dollar BAE-niň wizasyna sarp edilýän bolsa, galany Dubaýdan Türkmenistana barýan uçaryň biletine gidýär. Emma uçar bilediniň gymmatlygyna garamazdan, hyrydar köp bolup, bilet tapdyrmaýar.

Bu aralykda, köpler Türkiýe bilen Türkmenistanyň arasynda yzygiderli uçar gatnawynyň täzeden başlanmagyna sabyrsyzlyk bilen garaşýar.

Iýunyň başynda Türkmenistanyň prezidenti Serdar Berdimuhamedow beýleki ýurtlara-da uçar gatnawlaryny täzeden başlamak meselesini öwrenmegi tabşyrdy. 11-nji iýunda geçirilen hökümet ýygnagynda Berdimuhamedow beýleki ýurtlar bilen "ýakyn wagtda halkara gatnawlaryny dikeltmek" barada görkezme berdi. Uçar gatnawynyň haçan ýola goýuljagy barada anyk sene resmi derejede yglan edilmedi. Berdimuhamedow öz kararynyň "koronawirus ýokaşmasy bilen baglanyşykly dünýädäki ýagdaýyň kadalaşýandygy we köp ýurtda halkara syýahatlary üçin mümkinçiligiň bardygy" bilen baglydygyny aýtdy.

Şu wagt Türkiýedäki türkmen raýatlary uçarlaryň adaty tertipde gatnap başlamagyna sabyrsyzlyk bilen garaşýar. Habarçylaryň sözlerine görä, köpler 1-nji iýuldan, soň bolsa 15-nji iýulda uçuşlaryň täzeden başlamagyna garaşypdy, ýöne il içinde ýaýran bu maglumat Türkmenistanyň we Türkiýäniň awiakompaniýalary tarapyndan tassyklanmandyr.

Türkmenistanyň Daşary işler ministrligi, ýurduň daşary ýurtlardaky ilçihanalary we konsullyklary raýatlaryň pasport möhletiniň uzaldylmagynyň we uçar gatnawynyň tertibi baradaky maglumatlary kommentirlemeýär.

Rus dilinde hem okaň

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

XS
SM
MD
LG