Türkmen aktiwisti-blogçy Farhat Durdyýew ady bilen tanalýan Farhat Meýmankuliýew Stambulda tussag edildi. Aktiwistiň egindeşleri Meýmankuliýewiň tussag edilendigi barada Azatlyga habar berdiler. Olaryň sözlerine görä, Meýmankuliýew 19-njy maýda agşam sagat 9 töweregi öýünde tussag edilipdir. Meýmankuliýew tussag edilenden soň, Stambulyň Tuzla etrabyndaky deportasiýa merkezine iberildi. Deslapky maglumatlara görä, türk polisiýasy aktiwisti Türkmenistanyň Stambuldaky konsullygynyň arzy esasynda tussag edipdir. Polşada ýaşaýan türkmen oppozisioneri Nurmuhammet Annaýew, Meýmankulyýewiň tussag edilmegi baradaky maglumatlaryň şol bir kwartirada ýaşaýan türkmenistanlylar tarapyndan tassyklanandygyny aýtdy. Farhat Durdyýew ady bilen çykyş edýän "YouTube" blogçysy, türkmen häkimiýetlerine garşy tankydy çykyşlary bilen tanalýar.
Azatlyga mälim bolan maglumatlara görä, Farhat Meýmankuliýew Stambuldaky öýünde tussag edildi. Polşada ýaşaýan oppozisioneri Nurmuhamhammet Annaýewiň, Meýmankulýew bilen bilelikde tussag edilen aktiwistlere salgylanyp, beren maglumatyna görä, munuň sebäbi Türkmenistan konsullygynyň polisiýa şikaýat bilen ýüzlenmegi bilen bagly bolupdyr. Meýmankuliýew we onuň bilen bile ýaşaýan beýleki üç türkmen raýaty anna güni agşam polisiýa äkidilipdir. Soň üç türkmen raýaty boşadyldy, Meýmankuliýew bolsa Stambulyň etegindäki Tuzla deportasiýa merkezine iberildi.
“Farhat Meýmankuliýew Stambuldaky türkmen konsullygynyň haýyşy boýunça tussag edildi. Birnäçe gün öň onuň yzarlanýandygy belli boldy. Farhatyň özi, “YouTube” kanalynda öz awtoulagyna GPS enjamynyň gurlandygyny habar berdi. Ol enjamyň konsullyk işgärleri bilen baglanyşykly türkmenler tarapyndan gurlandygyny öňe sürdi "- diýip, Annaýew aýtdy.
Farhat Meýmankuliýew soňky "YouTube" çykyşynda GPS enjamyndaky SIM kartanyň Saidulla Rozybaýew atly adamyň adyna hasaba alnandygyny öňe sürdi.
Azatlyk Radiosy Stambuldaky Türkmenistanyň konsullygyndan düşündiriş alyp bilmedi.
Azatlyk bilen anonim gürleşen birnäçe çeşme blogeriň tussag edilmegi bilen baglylykda ondan şikaýat bilen soňky aýlarda birnäçe adamyň ýüz tutandygyny we olaryň Türkmenistanyň konsullygy bilen ilteşikli adamlardygyny aýtdylar.
Iň soňky maglumatlara görä, Meýmankuliýew henizem deportasiýa merkezinde galýar. Şenbe güni türk adam hukuklary guramalarynyň biriniň aklawçylary onuň bilen duşuşdy. Annaýewiň sözlerine görä, blogçy olara polisiýa bölüminde onuň bilen türkmen konsullygynyň işgärleriniň gürleşendigini aýdypdyr.
2021-nji ýylyň awgust aýynda Azatlyk Radiosy Stambuldaky türkmen konsullygynyň öňünde geçirilen demonstrasiýalarda diplomatik wekilhananyň işgärleriniň Farhat Meýmankuliýewi (Durdyýewi) ele salandygyny we konsullyk binasynda birnäçe sagatlap ýenjendigini habar beripdi. Soňra aktiwist içeri işler ministri Süleýman Soýlunyň gatyşmagyndan soň boşadylypdy. Meýmankuliýew Stambulyň prokuraturasyna konsullyk işgärleri tarapyndan bikanun tussag edilendigi barada şikaýat etdi, ýöne türk häkimiýetleri bu meselä ýeterlik ähmiýet bermedi.
Farhat Meýmankuliýew, 2020-nji ýylyň başynda döredilen sürgündäki türkmen aktiwist hereketiniň ady belli wekillerinden biridir. Ol "YouTube" kanalynda we beýleki sosial platformalarda türkmen häkimiýetlerini tankytlaýar.
Türkiýedäki raýat aktiwistleri 2020-nji ýylyň başynda Türkmenistanyň awtoritar hökümetine garşy çykyp başlapdy. Protest hereketiniň döremegine ýurtdaky sosial-ykdysady ýagdaýlar sebäp boldy. Koronawirus pandemiýasy wagtynda we ýurduň gündogar we günorta sebitlerinde güýçli tupandan soň häkimiýetleriň ilata kömek bermezligi, protest hereketiniň güýçlenmegine goşant goşdy.
Protestlere jogap hökmünde türkmen häkimiýetleri ýurduň içinde we Türkmenistanyň daşyndaky aktiwistlere garşy repressiýalary güýçlendirdi.
22-nji maýda mälim bolşuna görä, Orsýetde hem Türkmenistanyň bir raýaty tussag edildi. Adam hukuklaryny goraýjy "Memorial" guramasynyň maglumatyna görä, 16-njy maýda Leningrad sebitiniň Wolhow şäherinde "yslam ekstremizmi" bilen bagly toslanyp tapylan sud işi sebäpli Türkmenistanda gözlenýän Aşyrbaý Bekiýew tussag edilipdir. 19-njy maýda Sankt-Peterburgyň Krasnoselskiý etrap sudy Bekiýewi migrasiýa kanunlaryny bozandygy üçin watanyna deportasiýa etmek kararyna geldi we ony Krasnoýe Selo atly ýerde daşary ýurt raýatlarynyň wagtlaýyn saklanýan tussaghanasyna dört aýlyk ýerleşdirdi. Türkmen raýatynyň aklawçysy suduň kararyndan şikaýat etmäge taýýarlanýar. "Memorial" guramasynyň bu beýanatyny "Türkmenistanyň Hronikasy" neşri çap etdi.
Garaşsyzlyk ýyllarynda Türkmenistan dünýäniň iň repressiw we ýapyk ýurtlarynyň birine öwrüldi. Türkmenistanda sosial-ykdysady ýagdaýyň ýaramazlaşmagy, işsizligiň ýokary bolmagy we soňky ýyllarda ilatyň açlyk çekmegi Türkmenistanyň içinde-de, ýurduň daşynda-da nägileligiň artmagyna sebäp boldy. Ýurduň içinde hökümete garşy islendik garşylygy basyp ýatyrmaga ukyply türkmen režimi Türkiýedäki ýüzlerçe müň türkmen migrantlarynyň arasynda raýat aktiwliginiň artmagyna ünsüni güýçlendirýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum