Sepleriň elýeterliligi

Soňky habar

Türkmenabatda 'arzan' azygyň baýramçylykly satuwy boldy


Türkmenistan (illýustrasiýa suraty)
Türkmenistan (illýustrasiýa suraty)

Türkmenistan döwlet garaşsyzlygyny gazanan senesini belleýän güni welaýat merkezleriniň bazarlarynda käbir gyt azyk önümleri peýda boldy. 27-nji sentýabrda Türkmenabadyň ýaşaýjylary subsidirlenen diýilýän bahalardan ýumurtga, pagta ýagy we towuk budlary ýaly azyk önümlerini satyn almak mümkinçiligine eýe boldular.

Türkmenabadyň Gök bazarynda irden adam köpdi, bu ýerde subsidirlenen bahalardan käbir azyk önümleri satyldy. Çeşmeleriň habar bermegine görä, satuwa ösümlik ýagy, ýumurtga, doňdurylan towuk budlary we doňdurylan balyk çäkli mukdarda çykarylypdyr. Ösümlik ýagy bir litri 31 manada, doňdurylan towuk budlary bir kilogramy 18 manada, 30 ýumurtga 22 manada satyldy.

Emma nobatda duran adamlaryň aglaba bölegine bu önümler ýetmändir. Az mukdarda satuwa çykarylan harytlar diňe nagt pula satylypdyr, töleg kartlary kabul edilmändir. Bu barada 27-nji sentýabrda Azatlyk Radiosynyň Lebap welaýatyndaky ýerli çeşmeleri habar berdi.

Gyt azygyň satuwda peýda bolmagy baýramçylyga gabat geldi. 27-nji sentýabrda Türkmenistan garaşsyzlygynyň 31-nji ýyl dönümini belleýär.

Baýramyň öňüsyrasynda Türkmenabatdaky käbir dükanlarda un hem gysga wagtlyk peýda boldy. Çeşmelere görä, un baýramçylykdan birnäçe gün öň, Türkmenabadyň merkezinde ýerleşýän döwlet dükanlarynda satylyp başlandy. Satuwyň baryşyna polisiýa işgärleri gözegçilik etdi.

Mundan öň subsidirlenen bahadan un soňky iki aýda ýerli dükanlaryň tekjelerinde görünmeýärdi. Ýurtda subsidirlenen bahadan un adam başyna aýda 5 kilogram möçberde satylýar.

Hökümet tarapyndan kesgitlenen bahalardan önümleriň satylmagyna henizem ilat tarapyndan uly isleg bar. Soňky iki ýylda hatda subsidirlenen bahalaryň hem ýokarlanmagyna, şeýle hem harytlaryň hiliniň pesligine garamazdan, adamlar köp sagatlap nobatda durýarlar, köplenç nobatda duranlaryň ençemesine azyk ýetmän galýar. Ilatyň ýaşaýyş derejesiniň yzygiderli pese gaçmagy we harytlaryň hem hyzmatlaryň gymmatlamagy ýurduň ýaşaýjylarynyň köpüsiniň azyk üpjünçiligini subsidirlenen bahalara garaşly edýär.

Bu aralykda, Aşgabadyň ýaşaýjylary üçin Garaşsyzlyk güni, geçen ýyl bilen deňeşdirilende, birneme asuda geçdi. Şonda-da, jaýlaryň ýanynda goýlan awtoulaglary süýräp äkitmek, şeýle hem ýaşaýlara jaýlarynyň penjirelerini ýapdyrmak ýaly talaplar berjaý edildi.

"Agşam awtoulaglary dargatdylar, sebäbi baýramçylyk mynasybetli gül gowşurulyş bolmaly" diýip paýtagtyň "Parahat" etrapçalarynyň birinde ýaşaýan Azatlygyň habarçysy 27-nji sentýabrda Aşgabatdan habar berdi.

Döwlet baýramçylyklarynyň öňüsyrasynda adatça ýurduň häkimiýetleri satuwa käbir azyk önümlerini çykarýarlar, paýtagtyň arassaçylygyna we daşky görnüşine has köp üns berýärler, şeýle hem ilata gözegçiligini güýçlendirýärler.

Ýurduň günbataryndaky Türkmenbaşy şäherinde Garaşsyzlyk gününiň öňüsyrasynda alkogol endikleri we neşe serişdelerine garaşlylygy sebäpli saglyk we bejeriş merkezlerinde hasaba alnan raýatlar häkimiýetler tarapyndan ýygnaldy we tussag astyna alyndy. Habarçylaryň maglumatlaryna görä, olar 10-15 günlük tussaglykda saklanýar. Käbir hadysalarda polisiýa işgärleri raýatlary olaryň çagalarynyň gözüniň öňünde ellerini baglap, alyp gidipdir. Mundan başga-da, polisiýa ozal iş kesilen we tussag bolan raýatlara 25-28-nji sentýabr aralygynda Garaşsyzlyk güni sowulýança öýlerinden çykmazlyk barada duýduryş berdi.

Rus dilinde hem okaň

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Forum

XS
SM
MD
LG